Nos frater Gaufridus de Fougeriis, humilis prior de Alto Jugo et decanus d'Escocoles, notum facimus universis presentibus et futuris, quod dominus Martinus de Vavre, presbiter, in nostra presentia propter hoc constitutus, sciens, prudens et spontaneus, habita consideratione ad zelum pie devotionis et ad affectum sincere dilectionis, quam Stephanus de Prissie clericus, filius Vincentii de Prissie fabri, dilectus et karissimus nepos suus, habet et diu habuit erga se, inspectis etiam obsequiis et servitiis dicto domino Martino a dicto Stephano, nepote suo, gratulanti animo exibitis et impensis, donat dictus dominus Martinus, dat, cedit imperpetuum et concedit coram nobis dicto Stephano et suis, tanquam bene merito donatione irrevocabili, facta inter vivos, presenti et recipienti donationem predictam, medietatem suam totius prepositure que spectat et pertinet jure directi dominii ad decanatum nostrum d'Escocoles, in tota parrochia de Montmalart et quiquid juris, actionis, racionis, proprietatis, et cujuscumque reclamationis dictus dominus Martinus habet et habere debet quoquo modo et ex quacumque causa, per se vel per alium, in prepositura supradicta ipsumque Stephanum super hiis procuratorem suum et verum dominum coram nobis constituit in rem suam. Devestit se dictus dominus Martinus in manu nostra de dicta medietate dicte prepositure donata (sic), et de omni jure quod habet in eadem. Et nos recepta devestitura, dictum Stephanum, de voluntate et mandato dicti domini Martini, de dicta medietate dicte prepositure investimus et in possessionem inmittimus, laudiis et venditionibus super hec nobis contingentibus a dicto Stephano habitis et receptis. Hanc autem donationem et omnia supradicta promittit dictus dominus Martinus coram nobis per juramentum suum super sancta Dei euvangelia corporaliter prestitum dicto Stephano et suis firmiter tenere inviolabiliter et imperpetuum observare et contra per se vel per alium de cetero modo aliquo non venire, nec contravenire volenti in aliquo consentire, nec facere, nec procurare aliquid per quod dicta donatio retractari valeat, vel etiam annullari. Renunciat dictus dominus Martinus coram nobis in hoc facto ex certa scientia et sub vinculo prestiti juramenti omni actioni et exceptioni doli mali, metus et in factum, donationis predicte modo predicto non facte, juri dicenti donationem quingentos aureos excedentem sine insinuatione non valere, omnibus causis ingratitudinis in jure insertis, injuriose seu inofficiose donationis, fori et cleri privilegio, illius decretalis de foro competenti Si diligenti beneficio, omni lesioni, circumventioni et deceptioni et omni auxilio et beneficio juris canonici et civilis, juri dicenti: generalem renuntiationem non valere. In cujus rei testimonium, ad preces et requisitionem dicti domini Martini nobis factas, sigillum nostrum presentibus litteris duximus apponendum. Datum anno Domini M^o CC^o nonagesimo, mense junii. (Trace du sceau)